Portrait vun een Speler vun uns Theotertruppe

Dit Johr geiht dat för mi op de annere Siet vun de Elv – ganz genau na Hamburg, genauer seggt na Barmbek.
Dor besöök ik vandag Alida Erhorn, de dor tosamen mit ehr Fründ Sven Müller in een Mietshuus wohnt – fast so een as in uns Theotersstück. Bloots dat ik nich dree Treppen hoch trampen mutt, üm bi ehr in de Wohnung to kamen.

Alida Bernadette Erhorn is an’n 30. Mai 1996 op de Welt kamen. Se harr dat man bannig eilig dorbi. Geburn is se op denn Weg na`t Krankhuus „Maria Hilf“ – praktisch direktemang op de Autobahn, in’n Krankenwagen! In ehr Kinderpass steiht denn ok as Geburtsort: „Rettungswagen DR II“.

Upwussen is de lütte Deern in Schwierstörp, op den Buernhoff vun ehr Vadder Wolfgang Hauschild. Dor harr Mama Arnhild Erhorn mit ehre Bröder Christopher (1990) un Adrian (1994) man alle Hannen vull to doon, üm denn lütten Wirbelwind to bändigen.

Alida kemm denn ok bald in’n Kindergorden „Kleiner Bär“ bi Fro Lüdi. Awers na een Tiet harr se dor keen Lust mehr up denn „Kinnergorden“. Un bevör se 2002 endlich in de Grundschool Ilstörp kummen is, weer se in de Vörschool in Neu Wulmstorf. „Da habe ich die Reihenfolge der Planeten gelernt.“ seggt se stolt, un rattert se glieks all in de richtigen Reeg rünner.

Na de Grundschool güng se up’t Gymnasium in Neu Wulmstorf, bliev dor twee Johr, un wessel denn na de Realschule, wo se ehrn Schoolafsluss maakt hett. Dat weer ehr aver nich noog – also güng se denn noch wieder na Stade üm dor dat Fachabi in Wirtschaft to maken.

Na de School würr denn die Lehr an de Reeg. Een Utbillung as Industriekoopfro bi Teckentrup stünn an. Alida hett fix markt, dat dat nich so ehr Ding is. Avers Opgeven kemm nich in de Tüüt. Also hett Alida de Utbillung brav dörchtrocken.

Een vun ehre leevsten Hobbys is dat Reisen. Na de Lehr hett se sik eerstmal een Uttied nahmen un so güng dat denn los. Nah Südamerika! Bolivien, Peru, Ecuador un Kolumbien – wedder een Ogenblick na Huus un bedden bi Elektro-Bellut jobbt. Denn aver wedder los. Südostasien! Thailand, Laos, Kambodscha, Malaysia, Indonesien. Acht Maand weer se mehr oder weniger alleen ünnerwegs. Dull!! So’n Moot mutt man eerst mol hebben!

Wedder to Huus, weer ehr dat nich noog, bloots in’t Huus to sitten oder op`n Hoff rümpusseln. Also hett se in Lüneborg an de Leuphana dat Studeeren anfungen. Mit Bachelor un Master in’t Sack hett se nu en fienen Job bi Albis-Leasing in Hamborg. Dor is se in de Personalafdeelung togang un hett dor veel mit Minschen to doon.

Op ehr Reis to sik sülvst weer ehr Sven meist jümmers dorbi – eerst as Fründ, denn „plötzlich“ as Levenspartner. Funkt hett bi de Beiden 2015 up’n 18. Geburtsdag vun Janik Rust, un siet den geiht se tosam dör’t Leven. För de Beeden weer kloor: Na dat Studium geiht dat na Hamburg. Un nu wohnt se nu tosamen een lütte Wohnung midden in Barmbek-Süd.

Sport un Musik sünd ehr gröttste Leidenschop. So speelt Alida all veele Johr im Speelmannstog de Alt-Flööte. Start hett se ehre musikalische Karriere in Neu Wulmstörp, aver intwischen is se giern bi de Ilstörper Speellüüd dorbi. An dat „Musik maken“ mach Alida nich bloots dat Spelen, man ok de Gemeenschop, de Konzentratschoon un dat man jümmers wat dorto lehrn kann.

Neben de Musik nimmt Sport een groden Platz in ehr Leven in. Mit Football hett dat bi ehr anfungen. Bi`n TV Neu Wulmstorf hett se bit to ehrn 17 Levensjohr in de Mannschaft speelt. Denn hett se ehre Leev för’n Triathlon entdeckt. Middeldistanz is ehr Ding, eerst 1,9 km Swemmen, denn 90 km op Rad und düchtig pedden un to`n Schluss 21 km Lopen. Da segg ik: „Respekt, mien Deern!“ – Ik weer al na’t Swemmen all platt.

Up de Froog, wo se to’t Theoterspelen kamen is, seggt Alida: „Ich wollte schon immer Theater spielen. In der Grundschule und im Kindergarten habe ich beim Krippenspiel mitgemacht,“ seggt se mit’n Grinen in Gesicht. „Und dann hat Henrik Martens mich gefragt, ob ich nicht mal Lust hätte beim Lesen auszuhelfen …“ Dor hett se denn ok nich lang öberleggen müss. Tja, un dor hett Alida de plattdüütsche Theoterluft schnubbert. 2023 stünn in’t Stück De Grillvereen un dat rode Auto dat eerste mol op de Bühne. Alida mag dat, de Lüüd to’t Lachen to bringen, to sehn, wie de Spraak leevt un Emotionen op de Bühn to bringen. „Im normalen Leben bin ich viel stiller“, seggt se een bedden verlegen. Over ganz ehrlich, dat kann ik gor nich so Recht glöven. ;-)

Ganz wichtig in ehr Leven is dat de Minschen authentisch un blots nich so opsett sünd. Ehrlich un echt mutt allens ween. Nie´e Entscheidungen mött jümmers good dörchdat ween. Jeedeen schull doch versöken, sik sülvst to verwirklichen.

För de Tokunft wünscht se sik, dat se dat wieder doon kann, wat ehr glöcklich maakt – viellicht mol wedder op`t Land trecken, ne Familie gründen, wer weet … Natüürlich allens tosamen mit ehrn Sven.

Alida, du büst een sympathische junge Deern mit veel Witz un Charme. Diene Kommentare wenn wi an Öven sünd, quasi ut de Büx schoten, haut uns so mennigmal üm un bringt uns jümmer düchtig to`n Lachen. So makt de Avende mit di veel Spoß.

Wat wi all noch sehr an di schätzt is, dat du tweemal de Week ohn Murren ut Hamborg hier to diene un uns Heimat kummst und dat jümmers mit Bus un Bohn.

Veelen Dank, dat du mi na Hamborg inladen hest – mi hett dat Spoß makt.